គន្លឹះក្នុងការនិយាយទៅកាន់អ្នកដទៃជាលើកដំបូង

ការយល់ច្បាស់ពីរបៀបនិយាយទៅកាន់អ្នកដទៃ អាចជួយអ្នកមានភាពងាយស្រួលក្នុង ការប្រាស្រ័យទាក់ទងទៅកាន់មនុស្សជុំវិញខ្លួន។ មិនថានៅក្នុងជីវិតរបស់យើងមិនថានៅសាលា កន្លែងធ្វើការ ឬចូលរួមសកម្មភាពសង្គមណាមួយឡើយ យើងតែងជួបមនុស្សថ្មីៗជាច្រើន ដែលយើងមិនធ្លាប់ស្គាល់ពីមុនមក។

ការជួបជាមួយមនុស្សថ្មីៗជារឿងធម្មតា ប៉ុន្តែការបង្កើតសន្ទនាជាមួយមនុស្សថ្មីៗ តែងជាឧបសគ្គ សម្រាប់មនុស្សជាច្រើន។ ការស្វែងរកពាក្យពេចន៍ដែលត្រឹមត្រូវ ជាបញ្ហាប្រឈមដ៏ធំមួយនៅពេលជួបនរណាម្នាក់ជាលើកដំបូង។ ការប្រាស្រ័យទាក់​ទងដែលមានប្រសិទ្ធភាព ជាការយល់ដឹងពីដំណាក់កាលនៃកិច្ចសន្ទនា ដែលយើងត្រូវដឹងពីវិធីនៃការចាប់ផ្ដើម សកម្មភាពគួរធ្វើ សំណួរមិនគួរសួរ និង តិចនិចក្នុងការបញ្ចប់កិច្ចសន្ទនានោះ។ ជាពិសេស ការមិនហ៊ាននិយាយទៅកាន់ អ្នកដែលទើបតែជួបដោយសារយើងមិនទាន់ស្គាល់គេច្បាស់។ តើគួរធ្វើដូចម្ដេច ដើម្បីនិយាយជាមួយ អ្នកដែលស្គាល់ថ្មីៗ ឱ្យមានប្រសិទ្ធភាព?

ដើម្បីបកស្រាយចំណុចសំខាន់ៗទាំងនេះកាន់តែស៉ីជម្រៅ Focus បាន​ជួប​សម្ភាសន៍​ជាមួយ លោក ចាន់ សុខម៉េង ជាមន្រ្តីទំនាក់ទំនងសាធារណៈនៃ ដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ (DMC) ដែល​ជួយ​ឱ្យ ​យុវជន​អាច​មក​ប្រើប្រាស់ សម្រាប់​ពង្រឹង​សមត្ថភាព​ក្នុង​ការនិយាយជាមួយអ្នកដែលជួបឬស្គាល់ថ្មីៗ។

១. ការចាប់ផ្ដើម

ការប្រើប្រាស់សមត្ថភាពក្នុងការចាប់ផ្តើមការសន្ទនាគឺជាជំនាញដ៏សំខាន់សម្រាប់បង្កើតបណ្តាញទំនាក់ទំនងដ៏ មានប្រសិទ្ធភាពមួយ។ ជាទូទៅការចាប់ផ្ដើម អាចចេញពីការនិយាយ សួស្តី និងញញឹមទៅកាន់បុគ្គលណាដែលយើងចង់សន្ទនាជាមួយ។ ការណែនាំខ្លួន ក៏ជាតិចនិចសំខាន់ដែលយើងអាចប្រើប្រាស់ដើម្បីស្គាល់គ្នាជាមួយមនុស្សថ្មីបាន ដូចជាករណី ដែលយើងចង់ស្គាល់មិត្តថ្មីរបស់មិត្តភក្តិយើង ដូចច្នេះយើងអាចពឹងឲ្យមិត្តភក្តិយើងណែនាំខ្លួនយើងទៅកាន់មិត្តម្នាក់ នោះ ឬក៏មិត្តថ្មីនោះមកកាន់យើងវិញ ដែលនេះប្រៀបដូចជាជំហាននៃការភ្ជាប់សេចក្តីដើម្បីចាប់ផ្ដើមនិយាយជាមួយ មនុស្សថ្មីបាន។

២. ការអនុវត្ត

សម្រាប់នៅក្នុងដំណាក់កាលធ្វើសកម្មភាពនេះមានចំណុចសំខាន់ៗ ដែលអ្នកគួរអនុវត្ត៖

•  គោរពដោយប្រើពាក្យសមរម្យៈ ការធ្វើឱ្យអ្នកដែលយើងកំពុងនិយាយជាមួយមានអារម្មណ៍ថាសំខាន់ និងទទួលបានការគោរពមានសារៈសំខាន់ណាស់។ តួយ៉ាងដូចជា ការប្រើប្រាស់ភាសា ពាក្យពេចន៍ជាដើម ទោះបីឃើញនរណាម្នាក់ក្មេងជាងយើង ពេលចាប់ផ្តើមក៏ត្រូវនិយាយពាក្យដែលគួរសមជានិច្ច។ ជាពិសេស នៅពេលទើបតែជួបនរណាម្នាក់ដំបូង ត្រូវដឹងពីដែនកំណត់នូវចំណុចថាអាចសួរឬមិនអាចសួរ។ ជាក់ស្ដែង ពេលជួបនរណាម្នាក់ភ្លាមៗមិនគួរសួរពាក់ព័ន្ធនឹងប្រាក់ខែ ព្រោះនៅពេលសួរនរណាម្នាក់ពីចំនួនលុយរបស់គេ វានឹងធ្វើឱ្យគាត់គិតថាយើងកំពុងតែវាយតម្លៃលើគាត់ ធ្វើឱ្យគាត់មានអារម្មណ៍មិនល្អ។ ជាជាងសួរការងារប្រាក់ខែប៉ុន្មាន អាចសួរធ្វើការនៅណា និងការសួរចង់ដឹងពីបទពិសោធន៍ការងាររបស់គាត់ជាដើម។ 
•  ការប្រើក្រសែភ្នែកៈ មិនថានិយាយជាមួយអ្នកស្គាល់ថ្មីៗឬស្គាល់យូរក៏ដោយ ពេលនិយាយជាមួយគាត់ត្រូវមើលមុខដោយ ការប្រើក្រសែភ្នែកយកចិត្តទុកដាក់ដែលអាចជួយឱ្យអ្នកនិយាយជាមួយមានអារម្មណ៍ថាយើងចាប់អារម្មណ៍ក្នុងការជជែកនោះ។ ពេលកំពុងនិយាយជាមួយគ្គ្នា មិនគួរទាញយកទូរស័ព្ទមកចុចលេងនោះទេ ព្រោះជាអកប្បកិរិយាមិនគោរពអ្នកដទៃ។  
•  សុំអនុញ្ញាតៈ កំឡុងពេលកំពុងនិយាយគ្នាស្រាប់តែមាននរណាទូរស័ព្ទមក មិនគួរទាញហើយដើរចេញពីកិច្ចសន្ទនានោះ ភ្លាមៗនោះទេ ត្រូវប្រាប់ឬស្នើរសុំចេញទៅនិយាយមួយភ្លែតឬអាចអាចបញ្ជាក់ទៅកាន់ភាគីម្ខាងទៀតត្រឡប់មកវិញនៅពេល ណាមួយ។ 
•  គិតលើកាយវិការៈ ការប្រើប្រាស់កភាសាកាយវិការភ្យបានសមរម្យ ជាអ្វីដែលត្រូវបានគេមើលរំលង។ ឧទាហរណ៍ ពេលជួបគ្នាភ្លាម គេកំពុងឈរនិយាយ បែរជាយើងទាញកៅអីមកអង្គុយនិយាយជាមួយគេ ដែលជាកាយវិការមិនសមរម្យឡើយ។យោបល់ល្អគួរតែឈរឬអង្គុយនិយាយដូចគ្នាកុំឱ្យនរណាម្នាក់មានអារម្មណ៍ ទើសទាល់ ឬក៏អាចរកកន្លែងសម្រួលឥរិយាបថឱ្យបានសមរម្យទាំងអស់គ្នា។

៣. ការបញ្ចប់កិច្ចសន្ទនា

ជាទូទៅ ដើម្បីបញ្ចាប់សន្ទនាយើងអាចប្រើប្រាស់រូបភាពសាមញ្ញបាន។ អ្នកអាចប្រាប់គេថាត្រូវមានការងារបន្ទាន់ សុំចេញទៅកន្លែងណាមួយ។ ហើយប្រសិនក្នុងករណី អ្នកចង់ធ្វើការទំនាក់ទំនងសម្រាប់ពេលក្រោយ

អ្នកអាចសួរលេខទំនាក់ទំនង ឬ ផ្លាស់ប្តូរនាមប័ណ្ណ ដើម្បីភាពងាយស្រួលក្នុងការទំនាក់ទំនងនាពេលអនាគត។ 

ជាទូទៅមនុស្សជាច្រើនគិតថា ជំនាញប្រាស្រ័យទាក់ទង គ្រាន់តែចេះនិយាយជាមួយអ្នកដទៃ មិនឆ្គងទៅបានហើយ។ ប៉ុន្តែជាក់ស្ដែង លក្ខណៈសំខាន់នៃការប្រាស្រ័យទាក់ទងគឺផ្ដោតទាំងលើការប្រើប្រាស់ពាក្យពេចន៍ សម្លេង អារម្មណ៍ និងកាយវិការ ដើម្បីធ្វើឱ្យបុគ្គលដែលកំពុងនិយាយជាមួយទទួលបានសារយ៉ាងមានប្រសិទ្ធភាព។ 

ការចេះរួមបញ្ចូលនូវចំណុចទាំងនេះ នឹងអាចជួយសម្រេចនូវការបញ្ជូលសារដែលយើងចង់និយាយ មានន័យថាអ្នកដែលទទួលសារនោះ បានយល់ពីអត្ថន័យ ដោយមិនមានការភ័ន្តច្រឡំ។ ជាពិសេស ការបង្កើតបណ្តាញប្រាស្រ័យទាក់ទងគឺជាផ្នែកមួយដ៏សំខាន់នៃការអភិវឌ្ឍន៍ខ្លួន។ លើសពីនេះការរាប់អាននិងការបង្កើតមិត្តភាពថ្មីៗមានសារៈសំខាន់សម្រាប់សុខុមាលភាពសង្គម ដែលប្រៀបដូចជាថ្នាំប៉ូវបំពេញក្នុងជីវិត និងអាចពង្រឹងភាពក្លាហានរបស់អ្នកដើម្បីក្លាយជាពលរដ្ឋពេញលេញមួយរូបផងដែរ៕

អត្ថបទនេះជាផ្នែកមួយនៃគម្រោងផតខាស់«គួរក្រៅម៉ោង»ភាគទីមួយរបស់យើងគឺដែលនិយាយអំពី៖ «ម៉េច​បាន​អត់​ហ៊ាន​សួរ?»។ បច្ចុប្បន្ននេះ អ្នកអាចស្តាប់”ផតខាស់គួរក្រៅម៉ោង”បានតាមរយ:តំណភ្ជាប់ខាងក្រោម។ ហើយកុំភ្លេចចុច Follow ឬ Subscribe ផតខាស់របស់ពួកយើងផងណ៎ា ដើម្បីទទួលបានព័ត៌មានអំពីភាគបន្តបន្ទាប់របស់ពួកយើង៖
🔗Youtube៖ https://bit.ly/3r2m9RK
🔗Spotify៖ https://spoti.fi/3NVegr4
🔗Apple Podcasts៖ https://apple.co/3NNXOIT
🔗Google Podcast៖ https://bit.ly/3jOEVb8