ការធ្វើការពីផ្ទះអាចជារឿងដែលស្ដាប់ទៅងាយស្រួល ប៉ុន្តែអ្វីដែលជាបញ្ហាចោទនោះ គឺមិនមែនមនុស្សទាំងអស់គ្នា គ្រប់គ្រងពេលវេលាបានល្អនោះទេ។
ការរាតត្បាតសកលនៃជំងឺកូវីដ១៩បានបង្កើតឱ្យមាន ការរស់នៅតាមគន្លងថ្មី (New Normal)ជាច្រើន ដែលចាំបាច់ឱ្យមនុស្សសម្របខ្លួនតាម ដើម្បីឆ្លងផុតពេលវេលាពោរពេញដោយភាពមិនច្បាស់លាស់មួយនេះ។
ក្នុងនោះ ការធ្វើការពីផ្ទះ (WFH: Work From Home) គឺជាជម្រើសមួួយដែលក្រុមហ៊ុនជាច្រើនអនុវត្ត ដើម្បីកាត់បន្ថយការជួបមុខគ្នាដោយផ្ទាល់របស់បុគ្គលិក។
តាមពិតទៅការធ្វើការដោយមិនចាំបាច់ទៅការិយាល័យមិនមែនជា Concept ដែលថ្មីស្រឡាងទាំងស្រុងនោះទេ។ តាំងពីមុនវត្តមានរបស់កូវីដ១៩ មនុស្សជាច្រើនក៏ធ្វើការដោយមិនទៅការិយាល័យដែរ។ ប៉ុន្តែភាគច្រើនកាលនោះគេនិយមហៅការអនុវត្តបែបនេះថា ការធ្វើការពីចម្ងាយ (Remote Work)។
សម្រាប់មនុស្សជាច្រើន ការធ្វើការពីផ្ទះអាចជារឿងដែលគួរឱ្យត្រេកអរមួយ។ ប៉ុន្តែនៅក្នុងរយៈពេលវែង ការធ្វើការពីផ្ទះមានលេចឡើងរនាំងមួយចំនួន ដែលរារាំងបុគ្គលិកពីការបំពេញការងារប្រកបដោយមានប្រសិទ្ធភាព។ ក្នុងនោះរួមមាន បញ្ហាក្នុងការបែងចែកពេលវេលាធ្វើការ ការពន្យាពេលក្នុុងការបំពេញការងារណាមួយ ភាពឯកា និងការធុញទ្រាន់ដោយការនៅកន្លែងដដែលក្នុងរយៈពេលយូរជាដើម។
ក្នុងចំណោមការរារាំងទាំងនោះ ការដឹងពីគន្លឹះដើម្បីគ្រប់គ្រងពេលវេលាបានល្អ អាចជួយឱ្យអ្នកបំពេញការងារដោយមានប្រសិទ្ធភាព ហើយអាចសន្សំពេលវេលា ដើម្បីយកទៅធ្វើអ្វីផ្សេងៗទៀតបានផងដែរ។ពីព្រោះ ការគ្រប់គ្រងពេលវេលាមិនបានល្អ អាចនាំឱ្យមានកត្តាអវិជ្ជមានមួយចំនួនរួមមាន៖ គុណភាពការងារចុះខ្សោយ លទ្ធភាពនៃការផលិតធ្លាក់ចុះ ដាក់ការងារឱ្យថ្នាក់លើយឺត និងការហត់នឿយជាដើម។
អនុវត្តគន្លឹះក្នុងការគ្រប់គ្រងពេលវេលាទាំងនេះ ដើម្បីទទួលបានបទពិសោធន៍ធ្វើការពីផ្ទះប្រកបដោយប្រសិទ្ធភាពជាងមុន
១ ក្បួន៣នាទី (The Three-Minute Rule)៖ ក្នុងការបំពេញការងារយើងមិនមែនតែងតែចាំបាច់ត្រូវធ្វើការងារដែលមានទ្រង់ទ្រាយធំរហូតនោះទេ។ ការងារខ្លះ គឺជាការងារតូចៗប៉ុណ្នោះ ដូចជា ការចុះហត្ថលេខា ការសរសេរអ៊ីមែល ការឆ្លើយតបសារអតិថិជន ឬមិត្តរួមការងារ។ល។ ការណ៍ទាំងនេះប្រហែលទាមទារពេលមិនដល់៣នាទីផង ក្នុងការបំពេញ។ ប៉ុន្តែ ប្រសិនបើអ្នកមិនបំពេញវា ហើយទុកចោល ការងារតូចៗទាំងនេះ អាចគរទៅច្រើនឡើងៗ ដែលអាចធ្វើឱ្យអ្នកមានអារម្មណ៍ខ្ចិលក្នុងការបំពេញវា ពេលដែលឃើញច្រើនពេក។ ដូចនេះ សម្រាប់ការងារដែលតូចៗ ហើយត្រូវការពេលមិនលើសពី៣នាទីក្នុងការបំពេញ អ្នកគួរតែធ្វើវាមុន ជាជាងការទុកចោល។
២ ក្បួនធ្វើការងារមិនចូលចិត្តមុន (The Worst-First Rule)៖ ទោះបីជាអ្នកកំពុងធ្វើការក្នុងក្តីស្រមៃ ឬការងារដែលអ្នកស្រឡាញ់យ៉ាងណាក៏ដោយ ពេលខ្លះ កាលៈទេសៈបង្ខំឱ្យអ្នកត្រូវជួបនឹងអ្វីដែលអ្នកមិនចូលចិត្តដែរ។ ដូចនេះ ជាជាងការដែលពន្យាពេល ឬគេចវេះ អ្នកគួរតែកម្ចាត់វាចោលមុនគេ។ នេះសំដៅលើការដែលអ្នកគួរតែបំពេញវាឱ្យរួចរាល់ ទើបអ្នកមិនត្រូវអង្គុយគិតបារម្មណ៍ពីវាទៀត ក្នុងពេលធ្វើការផ្សេង។
៣ ក្បួន ១០នាទី (The Ten-Minute Rule)៖ ពិតណាស់ ពេលខ្លះមានការងារខ្លះ ដែលអ្នកខ្លាចក្នុងការបំពេញវា ហើយចង់គេចវេះពីវា។ ប៉ុន្តែ ការទុកវាចោលដោយការគេចវេះទៅវិញទេ ដែលធ្វើឱ្យអ្នកកាន់តែមានអារម្មណ៍ភ័យ ហើយអស់ថាមពលក្នុងខ្លួនទៅវិញទេ។ ដូចនេះ អ្នកគួរអនុវត្តក្បួន ១០នាទី ដែលមានន័យថា អ្នកគួរចំណាយពេល១០នាទីក្នុងការបំពេញការងារនោះ ព្រោះពេលដែលអ្នកចាប់ផ្តើមហើយ អ្នកនឹងមានអារម្មណ៍ចង់បន្តធ្វើវាឱ្យចប់។ ឬអ្នកអាចមានវិធីមួយទៀត គឺការដែលចំណាយពេល១០នាទីជារៀងរាល់ថ្ងៃ ដើម្បីបំពេញវាឱ្យចប់។
៤ កុំភ្លេចសម្រាក៖ ការធ្វើអ្វីច្រើន ឬតិចពេកមិនមែនជារឿងល្អនោះទេ។ ដូចនេះ អ្នកត្រូវស្វែងរកតុល្យភាព។ ការគ្រប់គ្រងពេលវេលាជារឿងសំខាន់។ ប៉ុន្តែ អ្នកមិនត្រូវភ្លេចទេថា ខ្លួននិងខួរក្បាលរបស់អ្នកក៏ត្រូវការគ្រប់គ្រងឱ្យបានល្អដូចគ្នា។ ដូចនេះ ពេលដែលមានអារម្មណ៍ល្វើយ អ្នកគួរផ្តល់ឱកាសឱ្យខ្លួននិងខួរក្បាលរបស់អ្នកបានសម្រាកខ្លះ។ យោងតាមការសិក្សាពីផលិតភាពរបស់មនុស្ស បុគ្គលិកគួរសម្រាកនៅរាល់ ចន្លោះពី៥០ទៅ៩០ នាទីម្តង ហើយការសម្រាកនោះគួរមានរយៈពេលពី ១៥ទៅ២០នាទី។ ក៏ប៉ុន្តែ ក្នុងពេលធ្វើការពីផ្ទះនេះ អ្នកមិនត្រូវយកចំណុចនេះជាលេសក្នុងការមិនបំពេញការងារនោះទេ។
៥ មានគម្រោងសម្រាប់ថ្ងៃស្អែក៖ មុនពេលចប់ម៉ោងធ្វើការ អ្នកគួរចំណាយពេល១០ឬ២០នាទី ក្នុងការសរសេរការងារទាំងអស់ដែលអ្នកត្រូវបំពេញសម្រាប់ថ្ងៃស្អែក។ ការធ្វើបែបនេះ នឹងធ្វើឱ្យអ្នកចាប់ផ្តើមថ្ងៃថ្មីជាគម្រោង ដែលវានឹងជួយសន្សំពេលវេលាផងដែរ ព្រោះអ្នកមិនចាំបាច់ចំណាយពេលអង្គុយគិតពីការងារដែលត្រូវបំពេញនៅថ្ងៃបន្ទាប់។ អ្នកអាចចាប់ផ្ដើមដោយការបំពេញការងារទាំងនោះតែម្តង៕
