បុគ្គលម្នាក់ៗប្រហែលជាធ្លាប់មានបទពិសោធន៍នៃការគេងមិនលក់ ដោយទាំងមិនដឹងខ្លួន។ ប្រសិនបើអ្នកមិនដែលជួបប្រទះបញ្ហាគេងមិនលក់ក៏ដោយ យ៉ាងហោចណាស់ក៏មានសមាជិកគ្រួសារម្នាក់ ឬមិត្តភ័ក្ដិណាម្នាក់ដែលអ្នកស្គាល់ផងដែរ។
ជំងឺគេងមិនលក់អាចកកើតឡើងបានជាធម្មតា រាប់បញ្ចូលទាំងពីការផ្លាស់ប្តូរព្រឹត្តិការណ៍ក្នុងការរស់នៅ រហូតដល់ដោយសារភាពតានតឹង(ស្ត្រេស)។ ជាមួយគ្នាផងដែរ ការគេងមិនទៀងពេល និងការទទួលអាហារច្រើនពេកពេលល្ងាចមុនពេលចូលគេង ក៏អាចជាកត្តាបង្កនៃការគេងមិនលក់។
ជំងឺគេងមិនលក់ត្រូវបានបែងចែកជាប្រភេទផ្សេងៗគ្នា។ដូច្នេះវាពិតជាសំខាន់ណាស់ដែលយើងត្រូវយល់ពីលក្ខណៈប្រភេទនៃជំងឺគេងមិនលក់នីមួយៗ ដើម្បីជៀសវាងការប្រើប្រាស់ថ្នាំមិនត្រឹមត្រូវ ដោយគ្មានវេជ្ជបញ្ជារបស់អ្នកជំនាញ។ ការណ៍នេះ អាចបង្កជាបញ្ហា ជាជាងផ្ដល់ដំណោះស្រាយ។ ហើយវិធីចម្បងដែរអាចជួយដោះស្រាយបញ្ហាការគេងមិនលក់នេះ តាមរយៈការផ្លាស់ប្ដូរទម្លាប់រស់នៅសាមញ្ញៗមួយចំនួន មានដូចខាងក្រោម៖
1. បង្កើតបរិយាកាសចូលគេងដែលសមស្របសម្រាប់ខ្លួនអ្នក៖ ជៀសវាងការធ្វើសកម្មភាពផ្សេងៗ ក្រៅពីគេង និងការរួមភេទក្នុងបន្ទប់គេងរបស់ខ្លួន គួរជ្រើសរើសពន្លឺ និងសីតុណ្ហភាពតាមអ្វីដែលខ្លួនចង់បាន។ ជាពិសេស អ្នកអាចទទួលទានតែ ដែលមិនមានជាតិកាហ្វេអ៊ីន ការងូតទឹកក្ដៅអ៊ុនៗ ការស្ដាប់តន្ត្រីស្រទន់ជាដើម។
2. ចៀសវាងការទទួលទានគ្រឿងស្រវឹងបន្ទាប់ពីពេលថ្ងៃត្រង់ ឬពេលយប់៖ គួរកំណត់បរិមាណនៃការទទួលទានជាតិអាល់កុល ដោយអាចទទួលទានភេសជ្ជៈមួយកែវ រយៈពេលជាច្រើនម៉ោងមុនពេលចូលគេង។
3. ធ្វើលំហាត់ប្រាណឱ្យបានទៀងទាត់៖ ជំនួយដល់ការគេង និងរយៈពេលគេង ប៉ុន្តែអ្នកគួរជៀសវាងការធ្វើលំហាត់ប្រាណខ្លាំង មុនពេលចូលគេង ព្រោះវាអាចធ្វើឱ្យអ្នកមានភាពពិបាកក្នុងការគេង ដោយសាររាងកាយបន្តផលិតថាមពល (ATP) ដែលធ្វើឱ្យអ្នកមានអារម្មណ៍សកម្ម។
4. រក្សាទម្លាប់គេងឱ្យបានទៀងទាត់៖ កាត់បន្ថយទម្លាប់គេងថ្ងៃ ព្រោះវាអាចបង្អាក់វដ្ដនៃការគេងរបស់អ្នក ហើយព្យាយាមចូលគេងនៅម៉ោងដដែលៗ ឱ្យបានទៀងទាត់។
5. ព្យាយាមជៀសវាងប្រើប្រាស់គ្រឿងអេឡិចត្រូនិក មុនពេលចូលគេង៖ មិនគួរសម្លឹងមើលអេក្រង់ពីគ្រឿងអេឡិចត្រូនិក ក្នុងរយៈពេលយូរ ដូចជាទូរស័ព្ទដៃ កុំព្យូទ័រជាដើម ជាពិសេសមុនពេលចូលគេង។
