អេ​កូ​ទេសចរណ៍៖ ដើរលេង​ផង រួម​ថែរក្សា​បរិស្ថាន​ផង​

អេកូទេសចរណ៍ ត្រូវបានកំណត់ថាជា“ការធ្វើដំណើរប្រកបដោយការទទួលខុសត្រូវ ទៅកាន់តំបន់ធម្មជាតិ ដែលថែរក្សាបរិស្ថាន ថែរក្សាសុខុមាលភាពរបស់ប្រជាជនក្នុងតំបន់ និងពាក់ព័ន្ធនឹងការអប់រំ” ។

ស្វែងយល់ពីធម្មជាតិពេលស្នាក់នៅជាមួយអ្នកភូមិ អាចនាំឱ្យមនុស្សខិតទៅជិតអ្វីដែលធម្មជាតិអាចផ្តល់ជូន និងបរិយាកាសរបស់កន្លែងនោះ។ អេកូទេសចរណ៍នាំអារម្មណ៍នៃដំណើរផ្សងព្រេងឲ្យកាន់តែស៊ីជម្រៅ ព្រោះវានាំមនុស្សទៅកន្លែងដែលមិនធ្លាប់ស្គាល់ និងទីតាំងឆ្ងាយៗ។ ទីតាំងខ្លះនៅដាច់ស្រយាល ដែលមិនមានមនុស្សច្រើនបានដឹង ប៉ុន្តែនេះមិនមានន័យថាមិនមានសក្តានុពលទេសចរណ៍នោះទេ។ 

ការសម្រាកនៅតាមផ្ទះស្នាក់ រៀបចំដោយអ្នកស្រុកផ្ទាល់ ផ្ដល់នូវអារម្មណ៍ស្និតស្នាល ដូចជាអាហារចម្អិនតាមផ្ទះ និងមានឱកាសបង្កើនទំនាក់ទំនង ជាមួយប្រជាជនក្នុងសហគមន៍។ ព្រមជាមួយនឹងការទទួលបានបរិយាកាសដ៏អស្ចារ្យ ការទៅកំសាន្តនៅតំបន់អេកូទេសចរណ៍ និង ស្នាក់នៅផ្ទះស្នាក់របស់អ្នកភូមិ គឺជាផ្ដល់ប្រាក់ចំណូលសម្រាប់ម្ចាស់ផ្ទះ កាត់បន្ថយការធ្វើចំណាកស្រុក និងជាការចូលរួមកិច្ចការពារបរិស្ថាន។ 

កន្លែងគួរទស្សនាណែនាំដោយ “ឱជារសតំបន់”

យើងសង្ឃឹមថា អ្នកបានតាមដានរួចមកហើយ អំពីម្ហូបប្រចាំតំបន់ នៅក្នុងខេត្តទាំងប្រាំ ដែលរៀបរាប់ក្នុងកម្មវិធី “ឱជារសតំបន់” រួមជាមួយវីដេអូ និងរូបភាពផ្សេងៗទៀត។ បេសកកម្មរបស់យើង គឺនាំចំណាប់អារម្មណ៍របស់អ្នក អោយកាន់តែជិតស្និទ្ធជាមួយប្រជាជនក្នុងតំបន់ទាំងនេះ។ ជាមួយនឹងខេត្តទាំង ៥ ដែលមានវត្តមានក្នុងកម្មវិធី “ឱជារសតំបន់” ខេត្តនីមួយៗមានសក្តានុពលទេសចរណ៍ផ្សេងៗគ្នា រាប់ចាប់ភូមិភាគខ្ពង់រាប រហូតទៅតំបន់ឆ្នេរសមុទ្រ។ 

ក្នុងអត្ថបទនេះ ក្រុមការងារ Focus នឹងលើកយកតំបន់អេកូទេសចរណ៍ គួរជាទីចាប់អារម្មណ៍សម្រាប់ការលម្ហែ និងមានទេសភាពស្រស់ស្អាត ស្របជាមួយគ្នាយុវជនអាចអាចស្វែងយល់អំពីប្រជាជនក្នុងតំបន់ និងចូលរួមថែរក្សាការពារធម្មជាតិ។ 

មណ្ឌលគីរី 

នៅក្នុងវគ្គដំបូងនៃកម្មវិធី“ឱជារសតំបន់” យើងបាននាំអ្នកទាំងអស់គ្នាទៅកាន់ភូមិភាគឥសាន្តនៃប្រទេសកម្ពុជា ដែលជាផ្ទះរបស់ក្រុមជនជាតិដើមភាគតិច និងតំបន់ខ្ពង់រាប ដែលសំបូរទៅភ្នំជាច្រើន។ 

ឃុំ ដាក់ដាំ

ឃុំដាក់ដាំ ជាកន្លែងមួយដ៏សមស្របបំផុត សម្រាប់អ្នកដែលចង់ឃើញផ្ទាល់ ពីជីវភាពរបស់ជនជាតិដើមភាតិចពូនង។ 

ដើរព្រៃ និងអេកូយុវទូត បានរួមគ្នាទាំងពីឆ្នាំ២០១៨ បង្កើតកម្មវិធីដើររុករកក្នុងព្រៃ និងកញ្ចប់កម្មវិធីធ្វើដំណើរ ជាមួយសហគមន៍នេះ។ ផ្ទះស្នាក់របស់ដាក់ដាំ មានទីតាំងស្ថិតនៅក្នុងភូមិពូត្រែង ហើយមានទិដ្ឋភាពភាពបែបសហគមន៍ជាមួយប្រជាជនពូនងជាម្ចាស់ផ្ទះស្នាក់។ តំបន់ទាក់ទាញសំខាន់ គឺទឹកជ្រោះជ្រៃធំ និងការដើរកម្សាន្តក្នុងព្រៃ។ ដោយស្នាក់ក្នុងផ្ទះស្នាក់របស់ភូមិ មានប្រជាជនវ័យចំណាស់ត្រៀមស្វាគមន៌ នាំភ្ញៀវទេសចរទៅដើរលេងព្រៃ និងនិយាយរឿងរ៉ាវអំពីសហគមន៍របស់ពួកគេ។

ដើម្បីទៅទីនោះអ្នកធ្វើដំណើរត្រូវធ្វើការទាក់ទងផ្ទាល់ជាមួយប្រជាជនក្នុងតំបន់ ឬសាកសួរព័ត៌មានបន្ថែមពី ដើរព្រៃ និងអេកូយុវទូត ដោយពួកគេមានទំនាក់ទំនងផ្ទាល់ជាមួយអ្នកស្រុក និងកំពុងធ្វើការយ៉ាងសកម្ម ដើម្បីលើកកម្ពស់តំបន់នេះ ជាពិសេសការជួយរបស់យុវជន។ 

The Mondulkiri Project: ទស្សនាដែនជម្រករបស់សត្វដំរី 

The Mondulkiri Project គឺជាអង្គការមិនមែនរដ្ឋាភិបាល ដែលមានផ្ដល់ជូនសេវាកម្មដំណើរទេសចរណ៍ ជាមួយសត្វដំរី។ កញ្ចប់ទស្សនា អាចមានរយៈពេលមួយ ឬពីរថ្ងៃ។ ប្រាក់ចំណេញរបស់ពួកគេនឹងត្រូវប្រើ ដើម្បីការពារព្រៃឈើស្ថិតក្រោមគំរោង និងថែរក្សាជម្រកសត្វដំរី។ ភ្ញៀវទេសចរមិនត្រូវបានអនុញ្ញាត ឱ្យជិះដំរីឡើយ ហើយអនុញ្ញាតឱ្យត្រឹមតែដើរ និងរាប់អានជាមួយដំរីរបស់ពួកគេតែប៉ុណ្ណោះ។ បុគ្គលិកទាំងអស់ គឺជាអ្នកស្រុករស់នៅក្នុងខេត្តមណ្ឌលគិរីផ្ទាល់។ កញ្ចប់ទស្សនា មានចាប់ពីតម្លៃ ៥០ ដុល្លារសម្រាប់ការធ្វើដំណើរមួយថ្ងៃ និងមានមគ្គុទេសក៍ក្នុងស្រុក ដែលអាចនិយាយភាសាអង់គ្លេស ហើយនាំអ្នកទេសចរទៅព្រៃដើរលេង នៅក្នុងតំបន់មួយដែលត្រូវបានការពារដោយគម្រោងនេះ។ បន្ទាប់មកអ្នកទេសចរ នឹងជួបសត្វដំរីចំនួន ៥ ក្បាល ដែលរួសរាយរាក់ទាក់ និងមានមរដំរីនៅជាមួយដែរ។ អាហារថ្ងៃត្រង់ត្រូវបានផ្តល់ជូន សម្រាប់កញ្ចប់ដំណើរកម្សាន្តមួយថ្ងៃ ខណៈពេលរសៀលក៏មានការងូតទឹកជ្រោះជាមួយដំរី។

ការស្នាក់នៅពេលយប់ ក្នុងកញ្ចប់រយៈពេលពីរថ្ងៃ នឹងអនុញ្ញាតឱ្យអ្នកធ្វើដំណើរ ចំណាយពេលជាមួយអ្នកស្រុក ដែលចំអិនម្ហូបបែបជនជាតិពូនង ស្រាប្រពៃណី និងបទពិសោធន៍នៃការគេងនៅក្នុងអង្រឹង។ 

ការកក់គម្រោងអាចធ្វើទៅបានដោយផ្ទាល់នៅលើគេហទំព័ររបស់ពួកគេ។ គម្រោងនេះ អនុញ្ញាតឱ្យយើងធ្វើដំណើរ ប្រកបដោយចីរភាព ស្វែងយល់ពីខេត្តមណ្ឌលគីរី និងជួបសត្វដំរីគួរឱ្យស្រឡាញ់ ដែលដំរីទាំងអស់ត្រូវបានជួយសង្គ្រោះ ពីការងារធ្ងន់ៗពីមុន។

ស្ទឹងត្រែង

ស្ទឹងត្រែងជាជម្រករបស់ត្រីប៉ាសេអ៊ីដែលជាត្រីមានតម្លៃខ្ពស់តាមរដូវកាល ដែលយើងបានបង្ហាញនៅក្នុងភាគទី ២។ ខេត្តស្ទឹងត្រែងប្រហែលជាខេត្តស្ងប់ស្ងាត់ ប៉ុន្តែទេសចរណ៍សហគមន៍របស់ពួកគេ គឺជាអ្វីដែលយើងមិនគួរមើលរំលង។

សហគមន៍អេកូទេសចរណ៍បូរីអូរស្វាយ

សហគមន៍អេកូទេសចរណ៍បូរីអូរស្វាយ ត្រូវបានបង្កើតឡើងដោយភូមិចំនួន ៥ មាន ភូមិអូរស្វាយ អូររុន កោះព្នៅ កោះហិប និងភូមិវើន​សៀន​ និងកោះចំនួន ៤ ព័ទ្ធជុំវិញ។ សហគមន៍នេះផ្ដល់ជូននូវសេវាកម្មផ្ទះស្នាក់ សម្រាប់ទេសចរដែលចង់ស្វែងយល់ពីទន្លេមេគង្គ និងធម្មជាតិ។ ដោយមានការគាំទ្រពីសមាគមអភិរក្សវប្បធម៌ និងបរិស្ថានសហគមន៍ តំបន់អេកូទេសចរណ៍នេះ ត្រូវបានបង្កើតឡើងតាំងពីឆ្នាំ ២០០៧ នៅអូស្វាយ។

អ្នកធ្វើដំណើរជ្រើសរើសទូក រឺម៉ូតូ រឺឡាន ធ្វើដំណើរពីទីរួមខេត្ត។ ពីភូមិអូស្វាយ មានទូកសម្រាប់ជួលជាច្រើន ហើយអ្នកធ្វើដំណើរអាចជ្រើសរើសទិសដៅរបស់ពួកគេ ដូចជាទៅដល់ជិតព្រំដែនឡាវ មើលផ្សោត ឬទៅកាន់តំបន់ទេសចរណ៍ធម្មជាតិដទៃទៀត។ ព្រៃលិចទឹកក៏ជាទិសដៅដ៏ល្បីល្បាញ រួមជាមួយកោះជាច្រើនទៀត និងការទស្សនាបក្សីដ៏អស្ចារ្យ។

សហគមន៍អេកូទេសចរណ៍អូស្វាយ មានមជ្ឈមណ្ឌលព័ត៌មានដែលបានបង្កើតឡើងនៅក្នុងភូមិរបស់ពួកគេ ហើយផ្ទះស្នាក់ត្រូវបានបំពាក់ដោយសំភារះសំខាន់ៗ ដែលអ្នកដំណើរត្រូវការ។ ការកក់ដំណើរកំសាន្ត និងព័ត៌មានក៏ងាយស្រួលរកនៅឯមជ្ឈមណ្ឌលទេសចរណ៍ខេត្តផងដែរ។ គម្រោងនេះ ផ្តល់នូវវិស័យទេសចរណ៍ប្រកបដោយនិរន្តរភាព និងជាឱកាសដ៏ល្អសម្រាប់ប្រជាជនក្នុងតំបន់ ដើម្បីទទួលបានការងាររកប្រាក់ចំណេញ ហើយក្នុងពេលតែមួយក៏ជាគម្រោងការពារសត្វព្រៃ និងជីវចម្រុះក្នុងតំបន់ជុំវិញតំបន់សត្វព្រៃរាមសារ។

ភូមិព្រះរំកិល

គម្រោងទេសចរណ៍សហគមន៍ភូមិព្រះរំកិល ត្រូវបានបង្កើតឡើងក្នុងឆ្នាំ ២០០៧ ដោយមានការគាំទ្រពីអង្គការបរិស្ថានដែលមានឈ្មោះថាម្លប់បៃតង ក្នុងគោលបំណងបង្កើនឱកាសការងារ សំរាប់ប្រជាជនក្នុងតំបន់ដាច់ស្រយាលនៃប្រទេសកម្ពុជា។ សហគមន៍នេះ នៅជាប់ព្រំដែនប្រទេសឡាវ និងមានបណ្ដាញភ្ជាប់ទៅនឹងអាងទឹកផ្សោតអន្លង់ឈើទាល។

ក្រៅពីមើលសត្វផ្សោត ភាពទាក់ទាញសំខាន់ៗសម្រាប់សហគមន៍នេះរួមមាន ការមើលសត្វស្លាប ច្រកចេញចូលទៅកាន់ទឹកជ្រោះសុភ័ក្ត្រមិត្ត។ ផ្ទះស្នាក់នៅទីនេះ គឺជាជម្រើសល្អមួយ ដើម្បីស្វែងយល់ការរស់នៅជាមួយភូមិពោរពេញទៅដោយគ្រួសារខ្មែរ – ឡាវ។

ពីទីរួមខេត្តស្ទឹងត្រែង មានឡានក្រុងខ្នាតតូច ដែលធ្វើដំណើរដោយផ្ទាល់ពីទីរួមខេត្តទៅភូមិនេះ ប៉ុន្តែមានត្រឹមតែមួយដងក្នុងមួយថ្ងៃ។ អ្នកអាចធ្វើដំណើរដោយជួលម៉ូតូ ឬឡានឯកជន ដើម្បីទៅទីនោះបាន។

កោះហាន

កោះហានគឺជាគម្រោងអេកូទេសចរណ៍ ដែលប្រមូលផ្តុំកោះ និងតំបន់ដីសើមរាមសាក្នុងស្រុកសាមគ្គី នាភាគខាងជើងក្រុងស្ទឹងត្រែង។ សហគមន៍នៅកោះនេះ ផ្ដល់ជូននូវបទពិសោធន៍ផ្ទះស្នាក់ សម្រាប់ភ្ញៀវទេសចរ។ ភាពទាក់ទាញសំខាន់ៗនៅកោះហាន រួមមានព្រៃលិចទឹក មើលសត្វបក្សី ការមើលថ្មកំបោរ និងឆ្នេរខ្សាច់កោះ។ ប្រជាជននៅលើកោះស្នែង ដែលមានទីតាំងនៅជាប់គ្នា មានជនជាតិខ្មែរ-ឡាវរស់នៅច្រើន ជាមួយឥទ្ធិពលទៅលើភាសាប្រាស្រ័យទាក់ទង និងអាហារ។

ផ្ទះស្នាក់ដែលមាននៅលើកោះស្នែង មានរចនាបថខ្មែរ។ អ្វីដែលល្អបំផុតសម្រាប់អ្នករុករក គឺការជិះទូក ដើរក្នុងភូមិ និង ព្រៃ។ អ្វីដែលគួរឱ្យចាប់អារម្មណ៍អំពីការស្នាក់នៅ គឺការភ្លក់អាហាររបស់ជនជាតិឡាវ ដែលចម្អិនដោយអ្នកស្រុក ដោយវិធីចម្អិនបែបប្រពៃណី។

ដើម្បីធ្វើដំណើរទៅកោះហាន អ្នកធ្វើដំណើរត្រូវចាកចេញពីទីក្រុង តាមឡានក្រុង ឬតាក់ស៊ី ចាប់ពីរង្វង់មូលត្រីប៉ាសេអ៊ី នៅក្នុងក្រុង ទៅសាឡាងកោះហានជាមុន បន្ទាប់មកជិះទូកប្រហែល ១០ នាទីទៅកាន់កោះហាន និងកោះស្នែង ដោយមានក្រុមគ្រួសារម្ចាស់ផ្ទះរង់ចាំនៅកំពង់ដរ។ ការកក់ទុកជាមុន នឹងមានទូកឯកជនមួយ រង់ចាំអ្នកដំណើរនៅសាឡាង។

សហគមន៍​អេកូ​ទេសចរណ៍​ទាំងអស់​ខាងលើ បើសិន​លោកអ្នក​មាន​ចំណាប់​អារម្មណ៍ លោកអ្នក​អាច​ធ្វើការ​ទំនាក់ទំនង និង​សា​កសួរ​ពត៍​មាន​តាមរយៈ​គេហទំព័រ Impact Explorer​

ពោធិ៍សាត់

ជាខេត្តមួយក្នុងចំណោមខេត្តទាំង៥ដែលស្ថិតនៅជាប់បឹងទន្លេសាប។ នៅក្នុងអត្តបទមុននៃកម្មវិធី «ឱជារសតំបន់» ពួកយើងបានយល់ដឹងខ្លះៗមកហើយអំពីភូមិអណ្ដែតទឹកកំពង់លួង ដែលស្ថិតនៅក្នុងខេត្តនេះ។ ប៉ុន្តែ Focus នឹងណែនាំភូមិនេះម្តងទៀត ក្នុងនាមជាតំបន់អេកូទេសចរណ៍

សហគមន៍ភូមិអណ្ដែតទឹកកំពង់លួង

ភូមិអណ្តែតទឹកកំពង់លួង គឺជាតំបន់អេកូទេសចរណ៍មួយ ដែលមានទីតាំងស្ថិតនៅលើបឹងទន្លេសាប នៅឃុំកំពង់លួង ស្រុកក្រគរ ដែលមានចម្ងាយប្រហែល ៣០ គីឡូម៉ែត្រពីក្រុងពោធិ៍សាត់។ ភូមិទាំងមូលមានទំហំប្រហែល ៣០ គីឡូម៉ែត្រនៅលើផ្ទៃទឹកនៃបឹងទន្លេសាប។

គម្រោងទេសចរណ៍ក្នុងភូមិអណ្ដែតទឹកកំពង់លួង ត្រូវបានបង្កើតឡើងដោយប្រជាជនក្នុងតំបន់ និងមានគោលបំណង លើកកំពស់ជីវភាពរស់នៅរបស់ប្រជាជនក្នុងតំបន់ តាមរយៈវិស័យទេសចរណ៍។

ជាក់ស្ដែងប្រជាជនប្រុសៗមានទូក ដែលអាចនាំភ្ញៀវទេសចរជិះទស្សនា និងមើលទេសភាពជុំវិញភូមិអណ្ដែតទឹកភូមិ រីឯប្រជាជនស្រីៗអាចជួយសម្រួល ដល់ការរៀបចំផ្ទះស្នាក់។ ដូច្នេះអ្នកទេសចរនឹងមិនចាំបាច់ព្រួយបារម្ភ អំពីម្ហូបអាហារ និងកន្លែងស្នាក់នៅអំឡុងពេល ពួកគេទៅកម្សាន្តនៅទីនោះទេ។

អ្នកទេសចរក៏នឹងមានឱកាសស្វែងយល់ អំពីការរស់នៅចម្រុះគ្នា រវាងប្រជាជនខ្មែរ និងវៀតណាម ដែលកំពុងរស់នៅទីនោះ។ លើសពីនេះទៅទៀត អ្នកនឹងទទួលបាននូវបទពិសោធន៍ថ្មីស្រឡាងមួយទៀត គឺរបៀបរបបនៃការរស់នៅលើផ្ទៃទឹក។

ភ្ញៀវទេសចរជាច្រើនមើលរំលង ព្រោះកង្វះការផ្សព្វផ្សាយ ហើយមានការពិបាកក្នុងការចូលទៅដល់។ ដូច្នេះប្រសិនបើអ្នកជាមនុស្សដែលចូលចិត្តការផ្សងព្រេង និងចូលចិត្តស្វែងរកកន្លែងថ្មី ភូមិអណ្តែតទឹកកំពង់លួងគួរតែជាទិសដៅបន្ទាប់របស់អ្នក។

ជួរភ្នំក្រវ៉ាញ

ជួរភ្នំក្រវ៉ាញ ជាជួរភ្នំ ដែលពោរពេញទៅដោយជីវចម្រុះ ជាដែនជម្រករបស់សត្វព្រៃ និងជាផ្ទះរបស់ក្រុមជនជាតិភាគតិចមួយចំនួន។ ស្ថិតលើផ្ទៃដីទំហំ ៤,៤ លានហិកតានេះមានទីតាំងនៅចន្លោះខេត្តចំនួន ២ គឺខេត្តកោះកុងនិងខេត្តពោធិ៍សាត់។

ដោយសារតែវាជាតំបន់ភ្នំ ការបោះជំរុំគឺជាសកម្មភាពល្អបំផុតមួយ ក្នុងចំណោមសកម្មភាពផ្សេងទៀត ដែលយើងអាចធ្វើបាន។ ការបោះជំរុំបែបធម្មជាតិជាមួយគម្រោង Cardamom Tented Camp គឺជាជម្រើសដ៏ល្អមួយ ដែលអ្នកគួរតែជ្រើសរើស ព្រោះថាអ្នកបានយល់ដឹងអំពីកិច្ចការការពារធម្មជាតិ ពីអ្នកល្បាតក្នុងព្រៃ របស់អង្គការអង្គការសម្ព័ន្ធមិត្តសត្វព្រៃ។

កំពត

នៅក្នុងភាគទី៤ នៃកម្មវិធីឱជារសតំបន់! យើងបាននាំទស្សនិកជនទៅកាន់ខេត្តកំពត ដែលមានសក្តានុពល ដោយសារសំបូរដោយគ្រឿងសមុទ្រ រមណីយដ្ឋានធម្មជាតិ និងសំណង់ប្រវត្តិសាស្ត្រពីសម័យអាណានិគម។

សហគមន៍នេសាទត្រពាំងរពៅ

មានចម្ងាយប្រមាណជា៣០គីឡូម៉ែត្រពីក្រុងកំពត សហគមន៍ត្រពាំងរពៅជាសហគមន៍មួយ ក្តោប២ភូមិ គឺភូមិព្រែកគ្រែង និងភូមិត្រពាំងរពៅ ដែលមានព្រំប្រទល់ជាប់នឹងខេត្តព្រះសីហនុ និងសហគមន៍នេសាទព្រែកត្នោត ដែលមានចម្ងាយប្រមាណជា៣គីឡូម៉ែត្រ និងទំហំ១២៥១ ហិកតា។

សហគមន៍នេសាទត្រពាំងរពៅបានប្រែក្លាយទៅជាតំបន់អេកូទេសចរណ៍នៅឆ្នាំ ២០១៩ ដោយសារតំបន់ធនធានធម្មជាតិដ៏សម្បូរបែប រួមមានដូចជាព្រៃកោងកាង និងកន្លែងចិញ្ចឹមត្រីក្នុងសមុទ្រជាដើម។ ភ្ញៀវទេសចរអាចរកគ្រឿងសមុទ្រស្រស់ៗ ទើបលើកពីទូកនេសាទ របស់អ្នកនេសាទនៅក្នុងសហគមន៍បាន។ សហគមន៍នេះក៏មានសេវាកម្មជូនភ្ញៀវទៅមើលផ្កាថ្ម និងស្មៅសមុទ្រផងដែរ។ បន្ថែមពីនេះ ស្ពានលយចូលសមុទ្រក្នុងសហគមន៍ គឺជាកន្លែងថតរូបដ៏ទាក់ទាញ។ ព្រៃកោងកាង នឹងផ្តល់នូវបទពិសោធន៍មួយបែបទៀត សម្រាប់អ្នកទេសចរ។ ភ្ញៀវក៏អាចទិញដើមកោងកាង ដើម្បីដាំនៅក្នុងសហគមន៍ផងដែរ។ លើសពីនេះទៅទៀត សហគមន៍មានក៏សេវាកម្ម ចម្អិនអាហារពីគ្រឿងសមុទ្រស្រស់ៗ សម្រាប់អតិថិជនតាមរូបមន្តប្រចាំតំបន់ផងដែរ។

ផ្ទះស្នាក់ នឹងផ្តល់បទពិសោធន៍ឱ្យអ្នកទេសចរ សិក្សាអំពីជីវភាពរស់នៅ របស់ប្រជាជននៅក្នុងសហគមន៍នេសាទសមុទ្រ។

សហគមន៍អេកូទេសចរណ៍ព្រែកត្នោត

សហគមន៍អេកូទេសចរណ៍ព្រែកត្នោតមានទីតាំងស្ថិតនៅក្បែរសហគមន៍ត្រពាំងរពៅ។ សហគមន៍នេះត្រូវបានបង្កើតឡើងនៅឆ្នាំ ២០០៧ ក្រោមការគាំទ្រពីអង្គការ Save Cambodia’s Wildlife។ ភាពទាក់ទាញនៃសហគមន៍នេះ មានទឹកជ្រោះ ព្រៃកោងកាង និងការមើលសត្វព្រៃ រួមទាំងបក្សាបក្សី ស្វា និងត្រីដូហ្វ៊ីនជាដើម។

សហគមន៍ក៏មានមគ្គុទេសក៍សហគមន៍សម្រាប់ភ្ញៀវទេសចរ ដើម្បីពិពណ៌នាអំពីធម្មជាតិ និងនាំឡើងភ្នំ។ សេវាកម្មផ្សេងៗដូចជាការធ្វើដំណើរតាមទូកក៏មាននៅក្នុងសហគមន៍ផងដែរ។ អ្នកទេសចរណ៍ក៏អាចឆ្លៀតពេលក្រឡេកមើល មជ្ឈមណ្ឌលតម្បាញនៅក្នុងសហគមន៍ថែមទៀត។

តម្លៃចូលសម្រាប់មនុស្សម្នាក់គឺមានតម្លៃ ៣ ដុល្លារ ប៉ុន្តែថ្លៃសេវាគឺសម្រាប់មូលនិធិអភិវឌ្ឍន៍សហគមន៍។ សហគមន៍ព្រែកត្នោត សាកសមសម្រាប់ដំណើរកំសាន្តរយៈពេលមួយថ្ងៃ ពីព្រោះទីនេះ គ្មានសេវាកម្ម សម្រាប់ទទួលភ្ញៀវទេសចរស្នាក់អាស្រ័យនៅពេលយប់ឡើយ។

សហគមន៍នេសាទត្រពាំងសង្កែ

សហគមន៍នេសាទត្រពាំងសង្កែនាំភ្ញៀវទេសចរឱ្យចូលរួមដាំដើមកោងកាង ដើម្បីជួយថែរក្សាជីវៈចម្រុះ នៅក្នុងខេត្តជាប់ឆ្នេរសមុទ្រមួយនេះបាន។ សហគមន៍ត្រពាំងសង្កែ មានចម្ងាយប្រមាណ ៨ គីឡូម៉ែត្រពីរង្វង់មូលធូរេន តាមបណ្តោយផ្លូវទៅខេត្តកែប។ អ្នកទេសចរអាចទៅដល់ទីនោះបាន ដោយមធ្យោបាយធ្វើដំណើរច្រើន ដោយជួលម៉ូតូនៅក្រុងកំពត រឺម៉កកង់បី រឺឡាន។

សហគមន៍មានសេវាកម្ម ដូចជាការជិះទូកនេសាទ ការចំអិនម្ហូប និងការធ្វើដំណើរកម្សាន្តប្រចាំថ្ងៃ ជាមួយអ្នកនេសាទក្នុងស្រុក។ ទីតាំងនេះ មានផ្ទះសហគមន៍នៅជាប់ព្រៃកោងកាង សម្រាប់ភ្ញៀវទេសចរស្នាក់នៅ។ អ្នកទេសចរអាចមើលឃើញទេសភាពថ្ងៃលិចនិងថ្ងៃរះ ក្នុងព្រៃកោងកាង។ នៅក្នុងសហគមន៍នេះ ភាគច្រើនគឺជាអ្នកនេសាទ ដូច្នេះការដាំដើមកោងកាង គឺជាកិច្ចការសំខាន់ ដើម្បីរក្សានិរន្តភាពនៃជីវចម្រុះសមុទ្រ សម្រាប់ការនេសាទជាលក្ខណៈគ្រួសាររបស់ពួកគេ។

កំពង់ស្ពឺ

ខេត្តកំពង់ស្ពឺ ជាខេត្តមួយដែលមានសក្តានុពល ក្នុងនោះរួមមាន ភ្នំខ្ពស់ជាងគេនៅកម្ពុជា និងត្រូវបានគេស្គាល់ថា ជាប្រភពដែលមានដើមត្នោតជាច្រើននៅកម្ពុជា។

សហគមន៍អេកូទេសចរណ៍ចំបក់

សហគមន៍ចំបក់ គឺប្រភេទអេកូទេសចរណ៍ ដំណើរការរាប់ឆ្នាំមកហើយតាំងពីឆ្នាំ២០០២ ស្ថិតនៅជាយឧទ្យានជាតិគិរីរម្យ។ គម្រោងសហគមន៍នេះមានភូមិចំនួន ៩ ដែលមានប្រជាជនចំនួនប្រហែល ១៨០០ នាក់ ឬ ប្រមាណជា ៥២០គ្រួសារ។ តំបន់ការពារសហគមន៍ចំបក់មានទំហំព្រៃប្រមាណជា ១២៦០ ហិកតា។ សហគមន៍ចំបក់ គឺជាគម្រូអេកូទេសចរណ៍មួយ ដែលបានផ្តល់ការពារជីវៈចម្រុះ និងគាំទ្រដល់ជីវភាពរស់នៅក្នុងមូលដ្ឋាន។

សកម្មភាពសម្រាប់ភ្ញៀវទេសចរ រួមមាន ការដើរឡើងភ្នំដើម្បីមើលទឹកធ្លាក់ដ៏ស្រស់ស្អាត ឬហែលទឹក។ បទពិសោធន៍នៃការដើរភ្នំ ក៏អាចត្រូវបានរួមបញ្ចូលផងដែរ ជាមួយនឹងការធ្វើដំណើរ ដើម្បីមើលទីតាំងល្បីៗក្នុងសហគមន៍ ដូចជារូងប្រជៀវជាដើម។ លើសពីនេះទៅទៀត ការជិះរទេះគោក៏ជាសេវាកម្មមួយ ដើម្បីឱ្យភ្ញៀវទេសចរទទួលបានបទពិសោធន៍ នៃការដឹកជញ្ជូនតាមបែបប្រពៃណីនៅក្នុងប្រទេសកម្ពុជា។ ការនៅផ្ទះស្នាក់ ដែលរៀបចំដោយអ្នកភូមិ នឹងនាំភ្ញៀវទេសចរទៅ ដើម្បីស្គាល់ពីជីវភាពរស់នៅរបស់អ្នកភូមិ។ គេហទំព័រសហគមន៍ចំបក់បានផ្តល់ព័ត៌មានលម្អិតអំពីសហគមន៍ និងសេវាកម្មរបស់សហគមន៍ បង្កើតភាពងាយស្រួលដល់អ្នកដែលមានចំណាប់អារម្មណ៍ស្វែងយល់អំពីដំណើរកំសាន្តនៅទីនោះ។

វិស័យទេសចរណ៍នៅក្នុងសហគមន៍ចំបក់បានបង្កើតប្រាក់ចំណូលសម្រាប់សមាជិកសហគមន៍និងធ្វើឱ្យជីវិតរបស់ពួកគេប្រសើរឡើង។ សហគមន៍ចំណាយប្រាក់ចំណូលទទួលបានពីទេសចរណ៍ ៤០% លើការអភិរក្ស ២៥% លើការផ្តល់ការគាំទ្រដល់ក្រុមដែលជួបការលំបាកនៅពេលត្រូវការ ២០% លើមូលនិធិអភិវឌ្ឍន៍សហគមន៍ និង ១៥% លើមូលនិធិបម្រុង។

ភ្នំឱរ៉ាល់

ភ្នំឱរ៉ាល់គឺជាភ្នំខ្ពស់ជាងគេនៅកម្ពុជាដែលមានកម្ពស់ ១៨១៣ ម៉ែត្រ។ ភ្នំនេះស្ថិតនៅខាងកើតឧទ្យានជាតិក្រវាញកណ្ដាល។ ភ្នំឱរ៉ាល់ត្រូវបានគ្របដណ្តប់ដោយព្រៃបៃតង នៅជួរភ្នំក្រវាញ ដែលជាទិសដៅដ៏ល្អ សម្រាប់អ្នកចង់ប្រកួតប្រជែងនឹងធម្មជាតិ ដើម្បីឡើងដល់ចំណុចខ្ពស់បំផុតនៅក្នុងប្រទេសកម្ពុជា។

ជាធម្មតាការធ្វើដំណើរទៅភ្នំឱរ៉ាល់ ត្រូវស្នាក់នៅតាមផ្ទះក្នុងស្រុកនៅភូមិស្រែខ្ទីមុននឹង អ្នកទេសចរបន្តឡើងភ្នំនៅថ្ងៃបន្ទាប់។ នៅលើភ្នំពុំមានមនុស្សរស់នៅទេ ដូច្នេះ អ្នកទេសចរត្រូវការឧទ្យាននុរក្ស ឬអ្នកភូមិដើម្បីជូនដំណើរ និងជួយយករបស់របរឡើងភ្នំ។ ដើម្បីឈានដល់ចំណុចកំពូល ត្រូវចំណាយពេលដើរប្រហែល ៦ ម៉ោងពីភូមិស្រែខ្ទី។ ភ្នំឱរ៉ាល់ត្រូវបានបង្កើតឡើងជាដែនជម្រកសត្វព្រៃហើយវាមានសត្វព្រៃជាច្រើនប្រភេទ។

ភ្នំឱរ៉ាល់ក៏ជាកន្លែងដ៏ល្អមួយសម្រាប់អ្នកទេសចរចូលចិត្តមើលបក្សីកម្រ។ សត្វបក្សីប្រហែល ២០០ ប្រភេទត្រូវបានគេកត់ត្រាទុកថា មាននៅក្នុងដែនជម្រកសត្វព្រៃភ្នំឱរ៉ាល់៕