ធ្មេចបើកៗ Focus ដំណើរការបានរយៈពេលមួយឆ្នាំហើយ។ Focus ចាប់ផ្តើមដំណើរកាលពីខែឧសភា នៅក្នុងឆ្នាំ២០២០ រាយការណ៍ព័ត៌មានពីជ្រុងផ្សេងៗ ជុំវិញជំងឺកូវីដ១៩ ដែលពេលនោះជាជំងឺដ៏ថ្មីស្រឡាង កំពុងរាតត្បាតជុំវិញពិភពលោក និងក្នុងប្រទេសកម្ពុជាផ្ទាល់ផងដែរ។ ដូចនេះ ការណ៍មានប្រភពព័ត៌មានអាចជឿជាក់ គឺជារឿងមួយដ៏ចាំបាច់បំផុត។ បន្ទាប់មក យើងក៏ចាំផ្តើមពង្រីកការរាយការណ៍លើប្រធានផ្សេងៗទៀតក្រៅពីកូវីដ ដោយផ្តោតលើយុវជនកម្ពុជា។ បច្ចុប្បន្ននេះ យើងផ្តោតសំខាន់លើការរាយការណ៍ព័ត៌មានលើប្រធានបទធំៗចំនួន៩ ក្នុងនោះរួមមាន៖ គួរដឹង លំហែ សុខុមាលភាព គ្រឿងបណ្តាលចិត្ត វប្បធម៌ អប់រំ អាជីព ហិរិញ្ញវត្ថុផ្ទាល់ខ្លួន និង ផែនដី។ ក្នុងការដំណើរការអស់រយៈពេលជាង១ឆ្នាំ កន្លងមកនេះ ក្រុមការងារ Focus បានឆ្លងកាត់ការសាកល្បងនិងមេរៀនជាច្រើន ដែលបានធ្វើឱ្យយើងទទួលបានបទពិសោធន៍ជាច្រើន។ មួយក្នុងចំណោមគុណតម្លៃទាំងបួនដែល Focus ប្រកាន់ខ្ជាប់គឺ ពួកយើងបន្តរៀន និងបន្តកែលម្អ។
ឥឡូវនេះ ក្រឡេកមកមើលស្នាដៃសំខាន់ៗ ដែលក្រុមការងារ Focus សម្រេចបាន ក្នុងរយៈពេលមួយឆ្នាំកន្លងមក។
ក្នុងរយៈពេលជាង១ឆ្នាំកន្លងមកនេះ យើងបានរាយការណ៍លើប្រធានជាច្រើន ក្នុងទម្រង់ផ្សេងៗរួមមាន អត្ថបទអត្ថាធិប្បាយ បទសម្ភាសន៍ និង បទវិចាណកថាជាដើម។ ខាងក្រោមនេះ ជាអត្ថបទទាំង១០ដែលមានចំនួនអ្នកអានច្រើនជាងគេ។
អាថ៌កំបាំងនៃកូវីដ៖ ការពិត ឬប្រឌិត» គឺជាផលិតផលដំបូងៗរបស់ Focus បង្តើតឡើងក្នុងពេលដែលជំងឺកូវីដ១៩កំពុងរីករាលដាលដំបូងៗ។ ខណៈដែលមិនទាន់មានការយល់ដឹងច្បាស់ពេញលេញពីជំងឺនេះ ពេលនោះយើងឃើញមានពាក្យចចាមអារាម និងការយល់ខុសជាច្រើន ទៅលើជំងឺផ្លូវដង្ហើមថ្មីនេះ។ ការណ៌នេះជាចំណុចផ្តើមនៃការរាយការណ៍លើ «អាថ៌កំបាំនៃកូវីដ៖ ការពិត ឬប្រឌិត»។ ក្រុមការងារ Focus បានលើកយកពាក្យចចាមអារាមផ្សេងៗ មកបកស្រាយដោយមានអំណះអំណាង និងផ្អែកលើការស្រាវជ្រាវបែបវិទ្យាសាស្រ្ត ថាតើការជឿតៗគ្នានោះ ជាការពិត ឬប្រឌិត។
ហិរញ្ញវត្ថុផ្ទាល់ខ្លួន គឺជាប្រធានបទសំខាន់មួយ ដើម្បីជួយក្នុងការគ្រប់គ្រងថវិកា ចំណូលចំណាយផ្ទាល់ខ្លួន និងគ្រួសារ។ ថ្វីបើប្រធានបទនេះ មានភាពស្មុគ្រស្មាញក្នុងការរាយការណ៍ និងត្រូវពន្យល់ពាក្យបច្ចេកទេសច្រើន ប៉ុន្តែក្រុមការងារ Focus ជឿជាក់ថា វាជាប្រធានបទដ៏សំខាន់មួយសម្រាប់ប្រជាជនកម្ពុជា ជាពិសេសយុវជន ក្នុងការត្រៀមខ្លួនឱ្យកាន់តែប្រសើរសម្រាប់អនាគត។ ទស្សនាឡើងវិញនូវកម្រងវីដេអូជាបទសម្ភាសន៍ទាំង៤ ជាមួយលោក អឿ សុធារ័ត្ន ប្រធាននាយកប្រតិបត្តិនៃការិយាល័យឥណទានកម្ពុជា [Credit Bureau Cambodia (CBC)] បានណែនាំពីចំណុចសំខាន់ៗ ទាក់ទងទៅនឹងការទទួលប្រាក់កម្ចីពីគ្រឹះស្ថានផ្តល់ប្រាក់កម្ចី។
«ទស្សនាចរណ៍អាជីព» ជាកម្មវិធីក្នុងទម្រង់ពហុព័ត៌របស់ Focus ដែលផ្តោតលើការចែករំលែកបទពិសោធន៍ជីវិតការងារ ជាពិសេសលើគ្រឿងបណ្តាលចិត្ត ដែលធ្វើឱ្យពួកគាត់ចាប់យកអាជីពបច្ចុប្បន្នរបស់ខ្លួន បញ្ហាប្រឈមផ្សេងៗក្នុងអាជីពរបស់ខ្លួន និងការភាន់ច្រឡំដែលមនុស្សទូទៅតែងតែយល់ខុសលើអាជីពរបស់ខ្លួន។ គោលបំណងចម្បងរបស់កម្មវិធី «ទស្សនាចរណ៍អាជីព» គឺការជួយឱ្យយុវជនជំនាន់ក្រោយ មានឱកាសស្វែងយល់ពីអាជីពផ្សេងៗនៅក្នុងប្រទេសកម្ពុជា ដែលអាចធ្វើឱ្យពួកគេជ្រើសរើសអាជីពទៅថ្ងៃអនាគតបានប្រសើរជាងមុន។
«ខ្ញុំអាចជួយឱ្យអ្នកដទៃផ្លាស់ប្តូរជីវិតរបស់គេ ស្របពេលដែលអ្នកដទៃអាចជួយផ្លាស់ប្តូរជីវិតរបស់ខ្លួនឯងដែរ វាប្រៀបបីដូចជាការរាំ ដែលយើងបោះជំហានទៅមុខទាំងអស់គ្នា»។
«យើងត្រូវតែចាប់ផ្តើមក្នុងចំណុចណាមួយ ព្រោះយើងមិនអាចទៅមុខបានទេ បើយើងអត់ចាប់ផ្តើមនោះ។ »
«ខ្ញុំគិតថា វាអាត្មានិយម ប្រសិនបើខ្ញុំអត់យកក្រណាត់ហ្នឹង មកឱ្យបងឬមួយក៏ប្អូនស្រីៗរីផ្សេងទៀត។ ខ្ញុំមិនចង់អាត្មានិយម ហើយខ្ញុំចង់ចែករំលែកវា ព្រោះខ្ញុំដឹងថា ពេលដែលខ្ញុំចែករំលែករឿងក្រណាត់ហ្នឹងទៅ វានឹងជួយដល់ស្រុកខ្មែរច្រើន។»
«ខ្ញុំចង់ផ្សព្វផ្សាយពីទេសចរណ៍របស់ខេត្តកំពត ទៅឱ្យពិភពលោកបានស្គាល់ ពីព្រោះ វិស័យទេសចរណ៍ជាមាសបៃតង ដែលអាចបង្កើតការងារជាច្រើនដល់ប្រជាជននៅក្នុងតំបន់។»
Focus អាន ជាក្លឹបអានសៀវភៅរបស់ក្រុមការងារ Focus ដែលណែនាំសៀវភៅដែលខ្លូនបានអាន លើប្រធានបទផ្សេងៗគ្នា ជារៀងរាល់ដើមខែថ្មី។ គោលបំណងរបស់ Focus អាន គឺការលើកកម្ពស់ការអានសៀវភៅ។ ដូចការលើកឡើងរបស់អ្នកនិពន្ធ JK Rowling អីញ្ចឹង «ពេលខ្លះអ្នកមិនស្រឡាញ់ការអាន ដោយសារអ្នកមិនទាន់ប្រទះប្រភេទសៀវភៅដែលអ្នកចូលចិត្តពិតប្រាកដ»។
បទវិចារណកថា គឺជាផ្នែកមួយនៃ Focus ដែលផ្តល់ឱកាសឱ្យអ្នករាយការណ៌ព័ត៌មានរបស់ Focus បញ្ជេញមតិ
ក៏ដូចជាចែករំលែកការយល់ឃើញរបស់ខ្លួនលើបញ្ហាផ្សេងៗនៅក្នុងសង្គមកម្ពុជា និងពិភពលោក។ កន្លងមក អ្នករាយការណ៌ព័ត៌មានរបស់យើង បានបញ្ជេញមតិផ្ទាល់ខ្លួនលើប្រធានបទផ្សេងៗពីគ្នា។
ការសម្ភាសការងារ គឺជាបទពិសោធន៍ដ៏ភ័យខ្លាចមួយសម្រាប់មនុស្សជាច្រើន។ វាអាចនឹងមានភាពលំបាកមួយកម្រិតទៀតសម្រាប់និស្សិតដែលទើបនឹងបញ្ចប់ការសិក្សា។ ទោះបីជាយ៉ាងណាក៏ដោយ វាតែងតែមានរឿងជាច្រើនដែលពួកគេអាចរៀន និងរៀបចំដើម្បីទាក់ទាញចំណាប់អារម្មណ៍ពីអ្នកសម្ភាសន៍ការងារបាន។ Focus បានស្នើឱ្យអ្នកស្រី តាទីយ៉ា ឆៃសាទីផង (Tatiya Chaisatephong) ដែលជាប្រធានផ្នែកជំនាញ និងការអភិវឌ្ឍនៅក្រុមហ៊ុន Smart Axiata ដើម្បីចែករំលែកនូវគន្លឹះមួយចំនួនក្នុងការសម្ភាសការងារសម្រាប់និស្សិតទើបបញ្ចប់ការសិក្សា។
«ឱជារសតំបន់!» គឺជាគម្រោងបែបពហុព័ត៌មានមួយ បែបកម្មវិធីដំណើទស្សនាចរ ដែលនាំអារម្មណ៍អ្នកទាំងអស់គ្នាទៅកាន់ខេត្តក្រុងផ្សេងៗនៅក្នុងប្រទេសកម្ពុជា ដើម្បីស្វែងយល់ពីមុខម្ហូបប្រចាំតំបន់ និងរាយការណ៍អំពីសហគមន៍ដែលរស់នៅទីនោះ។ គោលបំណងរបស់យើង គឺលើកទឹកចិត្តអោយយុវជនកម្ពុជា មានភាពសកម្មក្នុងការចូលរួមការពារបរិស្ថាន ថែរក្សាអត្តសញ្ញាណ និងទំនៀមទំលាប់ប្រពៃណី ដែលធ្វើអោយយើងមានមោទនភាពជាប្រជាជនកម្ពុជា។ ក្នុងនោះមុខម្ហូបចំនួន៥ មកពី៥ខេត្តផ្សេងគ្នា មានបង្កប់នូវចំណោទបញ្ហា ដែលទន្ទឹងរងចាំអ្នកដោះស្រាយ។ «ឱជារសតំបន់!» ត្រូវបានផលិតដោយមានការគាំទ្រផ្នែកហិរញ្ញវត្ថុដោយគម្រោង Earth Journalism Network នៃអង្គការ Internews។
Focus ផ្តល់តំលៃលើភាពចម្រុះក្នុងពិភពលោក។ ដូចនេះ ប្រធានបទ LGBTQ+ គឺជាប្រធានបទមួយដែលក្រុមការងាររបស់យើងយកចិត្តទុកដាក់លើ។ ជានិច្ចកាល អ្នករាយការណ៌ព័ត៌មានរបស់យើងតែងតែរិះរកមុំថ្មីៗក្នុងប្រធានបទនេះមកជូនមិត្តអ្នកអាន។ ទៅថ្ងៃខាង យើងសង្ឃឹមថា យើងនឹងមានអត្ថបទទាក់ទងនឹងប្រធានបទនេះច្រើនជាងមុន។
#LoveWins
#LoveisLove
«ផែនដី» គឺជាផ្នែកមួយរបស់ Focus ដែលសរសេរអំពីបរិស្ថាន។ បរិស្ថាន គឺជាអ្វីៗទាំងអស់របស់យើង ហើយបរិស្ថានរបស់យើងកំពុងស្ថិតនៅក្រោមការគំរាមគំហែងពីគ្រប់មជ្ឈដ្ឋាន។ ដូចនេះ យើងត្រូវតែចាត់វិធានការរួមគ្នាការពារផែនដីរបស់យើង មិនថាបញ្ហាសំរាមប្លាស្ទិក រហូតដល់ការប្រែប្រួលអាកាសធាតុ។ ការអានព័ត៌មានអំពីបរិស្ថាន ដើម្បីពង្រីកចំណេះដឹងអ្នក គឺជាចំណុចចាប់ផ្ដើមដ៏ងាយស្រួលមួយដែលអ្នកទាំងអស់អាចធ្វើបាន។
